Richard Cock se Chanticleer sangers bekoor
Dit was 'n puik vertoning en 'n waardige manier om die Kersseisoen in te wy.
SASOLBURG. – Teatergangers is op 28 November 2021 bederf met die Chantileer Singers onder leiding van Richard Cock met die perkussiespeler, Magda de Vries as gaskunstenaar.
Dit was die befaamde koor se eerste openbare optrede sedert Junie vanjaar en hul eerste in twee jaar by die Etienne Rousseau Teater.
Die vertoning het ook hul Kersseisoen afgeskop.
Die program was ‘n goeie samestelling van die tradisionele en bekende tot by die meer onbekende Kersliedere, insluitend ‘n nuwe weergawe van The Drummer Boy.
Richard het ook die gehoor bekoor met sy voorlesings tussen die uitvoerings.
Na die finale lied, Hark! The Herald Angels Sing, het die gehoor die Chantileer Singers, Richard Cock en Magda de Vries ‘n staande ovasie gegee.
Richard het die gehoor bedank dat hul steeds lewendige uitvoerings bywoon.
Hy het gesê dat die afgelope 18 maande vir hulle baie moeilik was, maar dat hul vol hoop is om hul Kerstoerprogram te kan voltooi.
