MEYERTON. – Asof die Vaaldriehoek die afgelope naweek nie genoeg eendeweer beleef het nie, het dit boonop op die Hoërskool Dr. Malan se velde sesse gereën.

Die Roar Machines en Badgers is onderskeidelik as High Performance Cricket se Ses-aan-‘n-kant se o.11 en o.13-kampioene gekroon.

In die o.11-eindstryd het die Roar Machines die Hurricanes met 12 lopies geklop om die o.11-kroon te dra.

e Badgers het Sondag die o.13-titel verower nadat hulle die Grizzleys oortuigend in die eindstryd met vier paaltjies geklop het.

Die Grizzleys het eerste gekolf en 45/2 in die toegelate 6 beurte aangeteken, waarna die Badgers slegs 4.5 beurte benodig het om die teiken verby te steek.

Wat die individuele toekennings betref, is Ryan Ax en Stephan Potgieter onderskeidelik as die top o.11-kolwer en bouler aangewys.

Wat die hardebaarde betref, het Dean Coetzer (beste kolwer), Mican Nel (beste bouler) en Jannie Coetzer (beste veldwerker) die pas aangegee.