VAALPARK. – Die mense van Vaalpark het besluit genoeg is genoeg. Hulle gaan nie toelaat dat hul dorp verval nie.

Eers het hulle die misdaad in Vaalpark nie net onder beheer gekry nie, maar totaal uitgewis!

Dit word reggekry deur goeie samewerking tussen die polisie, die gemeenskapspolisiëringsforums, Public Eye en vrywilligers wat in die nagte patrolleer en deur die dag waaksaam bly.

Nou het die Vaalpark gemeenskap hul samewerking een stappie verder gevat.

‘n Nuwe WhatsApp groep, “Proudly Vaalpark” is gestig.

Hier het die plaaslike Raad onder leiding van die DA en in samewerking met Public Eye ‘n inisiatief geloods om paaie reg te maak en padmerke oor te verf.

Arrie Coetzee van Public Eye sê hul leuse is: “Hier in Vaalpark, doen ons dit self!”

Volgens hom kom alles nou mooi bymekaar in die dorp en hulle is trots daarop dat die gemeenskap die inisiatiewe ondersteun.

In Vaalpark loop misdaadbekamping en munisipaledienste nou hand aan hand. Soos Arrie sê: “Ons wag nie meer dat iets gebeur nie of vir iemand anders om dit te doen nie. Ons doen dit self!”