VEREENIGING. – Die mure en dak is gedurende die jaar 2021 stukkie vir stukkie deur skrootmetaalwerwers weggedra en al wat oorgebly het is die strukturele raamwerk.

Die 25 000 m² fabriek op die hoek van Generaal Hertzogweg en Mario Milanirylaan behoort aan ArcellorMittal Suid-Afrika en staan glo as die Tosca-gebou bekend.

Die metaalreus het verlede jaar in November gesê die maatskappy werk saam met ’n onafhanklike diensverskaffer om van die eiendom op die hoek van Generaal Hertzogweg en Mario Milani-rylaan in Vereeniging ontslae te raak.

Tami Didiza, groepbestuuder vir Betrokkenheid van Belanghebbendes en Kommunikasie, het toe gesê die doel is om die huidige struktuur aan die hoogste bidder op te veil.

Vaalweekblad het in November navraag gedoen nadat die perseel ’n trekpleister geword het vir skrootmetaaldiewe en ongure karakters wat gedeeltes van fabriek stukkie vir stukkie afsaag en wegdra.