VAALPARK. – Woensdag, 2 Februarie 2022 was Wêreld Hardop Lees Dag. Vaalpark Primêr se Graad R leerders het die dag baie geniet. Boeke in die hand het hulle, hul verbeelding gebruik en stories vertel wat alles van feetjies tot by drake ingesluit het.

Die maats kan nog nie lees nie (hulle is dan nou maar eers ‘n paar weke in Graad R), maar stories kan hul wel vertel! Juffrou Maniela Venter het laat weet elkeen kon ‘n boek kies en dan ‘n storie opmaak na aanleiding van die prentjies in die boek.

Sy sê die kinders het op die plek met baie verbeeldingryke en interessante stories vorendag gekom. Die onderwysers het ook van die kans gebruik gemaak om stories voor te lees en wat is ‘n storie nou as mens nie so bietjie stemme kan namaak en dramaties kan raak nie?

“Almal het soveel pret gehad en daar is baie gelag,” vertel sy. Soos die jonge Siyabulela sy storie afgesluit het: “And the dinosaurs lived happily ever after!”