VEREENIGING. – Volgens mev. Anne-Marie Slabbert van die niewinsgewende organisasie Mekayla Memorial, wat die Paaseierjagtog gereël het, het hulle ongeveer 800 paaseiers in die veldjie versteek.

Die Paaseierjagtog het omstreeks 12:00 afgeskop waarna honderde van die buurt se kinders met oorgawe begin soek het vir die versteekte paaseiers.

Daar is heerlik aan die paaseiers wat gevind is gesmul.

Slabbert, wat in 2010 haar driejarige dogtertjie Mekayla (3) in ‘n fratsongeluk verloor het, hou sedert 2013 jaarliks die Mekayla Memorial Kerspartytjie waartydens sy jaarliks ongeveer 500 minderbevoorregte kinders van Leeuhof by haar huis bederf.

Volgens Slabbert is dit die eerste jaar wat die Paaseierjagtog gehou word.

Slabbert sê: “Ons hou elke jaar die Kerspartytjie, maar daar gebeur niks oor Paasfees nie, omdat ek gewoonlik vir die Paasnaweek weggaan.

“Hierdie jaar was ek by die huis omdat ek ‘n operasie ondergaan het.

“Ek het toe dit goedgedink om die Paaseierjagtog jagtog te hou.

“Dit was ‘n reuse sukses! Ons gaan dit defnitief volgende jaar weer hou,” sê Slabbert.

Volgens Slabbert kon die Paaseierjagtog alleenlik danksy die borgskappe van Scottish Rite, die Vryemesselaars, Royal Foods en Olympic Drankwinkel plaasvind.