Deneysville kerkbasaar om die draai
Maak 'n draai by die Vaaldam en kom kuier bietjie op Deneysville!
DENEYSVILLE. – Hier is iets om na uit te sien.
Terwyl die Vaaldam oorloop en die laaste kosmosse nog geil staan, is daar nog ‘n rede om jul motors in die rigting van Deneysville te stuur.
Die NG Kerk hou weer hul regte-egte tone-omkrullekker boere basaar op 7 Mei 2022. Die verrigtinge begin om 08:00.
‘n Boereorkes gaan die musiek verskaf, met plaaslike sanger, Armand Du Preez wat gehoor sal kan word.
Nog ‘n hoogtepunt is die mini-veiling wat om 12:00 gaan plaasvind.
Daar sal heeldag speletjies wees wat die jongklomp gaan besig hou.
Bring genoeg kontant vir al die mooie handwerk wat jy as geskenke vir ma vir Moedersdag kan koop, of jouself mee kan bederf.
Dan is daar natuurlik die eetgoed.
Lipleklekker jaffels, vetkoek, kerrie en rys, worsbroodjies, sosaties en spitbraai gaan enige koue en hongerkolle verdryf, maar hou maar ‘n plekkie oop vir nagereg, boeretroos koffie, tee en koeldrank.
Daar sal plaasvars vleis, lekkergoed, koek en ander gebak verkoop word.
Kom kuier sommer heeldag saam!
Waar:
NG Kerk Deneysville in die hoofstraat van Deneysville, Vrystaat.
GPS: -26.89097299684788, 28.097052717038192
