“Ons het so twee maande gelede hierheen verhuis juis omdat ek ‘n kuns- en natuur-tipe mens is. Ons gooi elke dag mieliepitte en kos vir die wilde voëls. Hier is al baie voëlsoorte wat mak begin raak en elke dag kom eet,” vertel Annetjie.

Hulle het een dag ystervarkpenne in die erf opgetel, en so maand gelede die eienaar van die penne omstreeks 21:00 in die tuin gesien weglê aan die mieliepitte.

“Wat n belewenis vir my wat nie eers ‘n spinnekop sal doodmaak nie! Ons merk toe dat die ystervark so elke derde dag van die mieliepitte kom eet.  Na ‘n Google-sessie begin ons toe saans piesangs en appels uitsit vir ons kuiergas.”

Annetjie, wat ook baie lief is vir foto’s neem (sommer so met haar selfoon) het besluit om te kyk of sy die ystervark kan afneem. Sy was verheug toe sy uiteindelik daarin geslaag het.

Sy het dit reggekry om die ystervark se vertroue te wen. Sy staan al so armlengte van hom af sonder dat hy weghardloop.

“Ek het nogal ‘n aanvoeling en verbinding met enige diere. Ek hoop die ystervark sal my genoeg vertrou om binnekort ‘n appel uit my hand te eet,” sê Annetjie.