VEREENIGING. – Die skool het in ’n verklaring laat weet dat die kinders veilig is en dat die verdagtes in hegtenis geneem is.

Volgens kapt. Fikile Funda, die polisie se woordvoerder in Vereeniging, word die saak wel deur die polisie se eenheid vir gesinsgeweld, kinderbeskerming en seksuele oortredings ondersoek.

Funda het vroeër gesê dat daar geen rekord van die saak is nie, maar nou is daar vasgestel dat die spesialiseenheid die ondersoek behartig en dat die verdagtes reeds in hegtenis geneem is.

Volgens Funda is die verdagtes formeel aangekla en waarskuwingsverklarings by hulle afgeneem.

Hulle is weens hul ouderdomme vrygelaat en in die sorg van hul ouers geplaas.

Die slagoffer se pa het Dinsdagoggend (31 Mei 2022) gesê die polisie moet nog ’n verklaring afneem.

Die skool het in ’n verklaring afrigters, ouers asook ons sekuriteitswagte wat betrokke was bedank vir hul vinnige reaksie gedurende die insident.

“Ons besef net weer watter gevare daar buite is en ons wil graag alle ouers herinner om altyd n wakende oog oor u kinders te hou, veral by groot byeenkomste.

“Laastens wil ons graag ons ondersteuning bied aan die ouers en kinders wat in die traumatiese ervaring betrokke was. Ons gebede en gedagtes gaan ook uit aan hulle op die pad tot herstel,” lui die uittreksel uit die verklaring.