Boeresportdag vir pa’s en kinders gehou
By Vaalpark Primêr is families belangrik, daarom het hulle Vadersdag en Jeugdag sommer saam gevier.
VAALPARK. – 16 Junie was Jeugdag en 19 Junie Vadersdag. By Vaalpark Primêr is die twee dae gekombineer met ‘n Vadersdag Braai en Boeresport dag op 16 Junie.
Die dag is deur die leerlingraad aangebied wat gesorg het vir die braaivleisvure en bykos.
Die pa’s, oupas en ooms het hul eie vleis en stoele saamgebring.
Juffrou Maniela Venter sê dit was ‘n ongelooflike lekker dag. Oupas het saam met die kinders balle oor die rugbypalle geklits en die pa’s is goed besig gehou met al die boeresports.
Daar was driebeenresies, “kruiwa-stoot”, eierresies en olieringe eet wat aan toue vasgemaak is.
Naas die vleis op die kole, het die kinders ook stokbrood gebraai en elke oomblik geniet.
Die skool het laat weet hulle is dankbaar vir elke pa, oupa, stiefpa en oom wat opgedaag het om die dag so spesiaal te maak.
Nog foto’s van die pretdag is te siene op Vaalpark Primêr se Facebookblad.
