Kwadrupleeg in koma nadat krag afgaan, ventilator stop
'n Kwadrupleeg wat met behulp van 'n ventilator asem haal is in 'n koma nadat die masjien weens 'n kragonderbreking in Peacehaven gestop het.
VEREENIGING. – Willie Mutingh lê volgens sy ma in ‘n koma by die MediClinic Vereeniging hospitaal.
Volgens sy ma, Lettie, het die krag Saterdagaand (25 Junie 2022) in die omgewing van 21:00 afgegaan.
“Ons was besig om Willie van die ventilator af op suurstof oor te sit toe Willie in die koma gegaan het.”
Die krag in die buurt was teen Sondagaand steeds af.
Vaalweekblad het in Maart verlede jaar berig dat inwoners van dié buurt swaar gebuk gaan onder kragonderbrekings.
Lettie het toe verduidelik dat Willie se toestelle nie sonder elektrisiteit kan funksioneer nie en dat kragonderbrekings hom erg raak.
Willie is verlam sedert hy as tienerjarige homself beseer het toe in ‘n fratsongeluk by Hoërskool Vereeniging (nou Vereeniging Gimnasium) se swembad.
Prudence Hlanyane, raadslid vir Wyk 15 van die Emfuleni Plaaslike Munisipaliteit, sê inwoners van Peacehaven het amper meer kragonderbrekings as wat hulle krag het.
Volgens haar lê die probleem by die Emfuleni Plaaslike Munisipaliteit wat keer op keer dieselfde kontrakteur aanstel ten spyte daarvan dat hulle uit en uit bewys het dat hulle nie in staat is om die werk te doen nie.
“Herstelwerk word nie behoorlik gedoen nie en die buurt ervaar gevolglik keer op keer kragonderbrekings. Ten spyte daarvan word dieselfde kontrakteur keer op keer met die tender beloon,” sê sy.
Volgens Hlanyane is die kontrolekamer nie funksioneel nie.
“Inwoners wil graag in staat wees om kragonderbrekings te rapporteer en met gerustheid te weet dat die probleem aangespreek sal word.
“Op die oomblik word kragonderbrekings gerapporteer en dikwels is daar geen terugvoer nie. Saterdag se kragonderbreking is reeds Saterdagaand gerapporteer maar daar is eers Sondag ‘n boodskap ontvang wat sê: ‘noted’”.
Dan is daar ook die probleem van eiendomme waarop daar onwettig gebou is.
“Die eiendomme is nooit gehersoneer nie en op die oomblik is daar te veel mense wat in die buurt bly. Dit plaas enorme druk op die kragnetwerk.
“Ons het die departement van plaaslike eknomiese ontwikkeling gewys waar die eiendomme geleë is.
Die vorige burgemeester (eerw. Gift Moerane) was saam met die polisie uit tydens ‘n klopjag wat gehou is, maar niemand het ooit aan die pen gery nie en die mense bly steeds daar en plaas steeds druk op die bestaande kragnetwerk,” sê Hlwanyane.
