VANDERBIJLPARK. – Volgens Yvonne Coertze, raadslid vir Wyk 9 van die Emfuleni Plaaslike Munisipaliteit, word die daaglikse kragonderbrekings veroorsaak deur substasies en kabels wat brand.

Die probleem kan hoofsaaklik toegeskryf word aan onwettige konneksies wat deur studente en sommige huis eienaars gedoen word.

“Omdat Emfuleni ook nie die regte prosedures volg wanneer krag herstel word nie, hou kabels eenvoudig aan om te brand,” vertel sy.

Volgens Coertze is dit ‘n daaglikse stryd om te verseker dat SE 7 die basiese dienste kry wat hulle verdien en waarvoor hulle betaal.

Sy sê daar ‘n wonderlike LSDP-plan wat 90% van die probleme in SE 7 tot ‘n einde sal bring, maar die probleem is dat die munisipaliteit dit nie toepas nie.

Om die proses aan te help en vuur te maak onder Emfuleni het Coertze ‘n petisie opgetrek wat deur die inwoners geteken kan word.

Die petisie behels onder andere:

*Dat ‘n moratorium op alle hersonering aansoeke en ontwikkelings geplaas word.

*Dat die LSDP-plan toegepas word op eiendomme wat reeds suksesvol hersoneer het.

*Dat alle onwettige konneksies verwyder word en die DB-bokse op so manier gesluit word om te verseker dat net Emfuleni toegang het en dat herstel werk aan die substasies aan die standaarde moet voldoen.

Coertze sê: “Ek kan nie langer toekyk hoe Emfuleni se ‘ons-gee-nie-om’-houding inwoners ontwrig nie.

“Soos dit is sukkel inwoners reeds om kop bo water te hou met die verhoogde tariewe in brandstof en dienste, nou moet hulle die begroting aanpas om te verseker daar is brandstof vir ‘n kragopwekker ook en soms groot verliese ly omdat voedsel weggegooi moet word,” sê Coertze.