Die Werner Joubert Tennisakademie (WJTA) bied op Woensdag 7 September 2022 ‘n gholfdag by Heron Banks aan om fondse vir twee belowende jong hokkiespelers van die Vaaldriehoek in te samel.

Ruan Venter, hoofseun van Hoërskool Sasolburg en Daniël Grobler, ‘n leerling aan Hoërskool Transvalia, is albei gekies vir die Elsie Coetzer Hokkieskool (ECHS) se uitnodigingspan wat in Oktober na Nederland sal reis.

Die seuns speel albei vir hul skole se onderskeie eerste spanne. Ruan is kaptein van Hoërskool Sasolburg se eerste span.

Die toer sal vanaf 2 tot 11 Oktober plaasvind waartydens die span Amsterdam, Den Haag en Maatricht sal besoek.

Die ECHS-uitnodigingspan sal tydens hul reis afrigtingsklinieke bywoon en ook aan wedstryde deelneem.

Die doel van die toer is om talentvolle jong hokkiespelers soos Ruan en Daniël aan internasionale hokkie, sowel as geleenthede bloot te stel.

Die kostes van die toer beloop tussen R40 000 en R50 000.

Om geld vir die seuns in te samel en hulle te help om in Nederland te kom het hul tennisafrigter Werner Joubert besluit om ‘n gholfdag te reël.

Albei die hokkiespelers behoort ook aan Joubert se tennisakademie.

Die gholftoernooi word in ‘n vierbal formaat aangebied en die inskryffooi beloop R1 400 per span van vier.

Die eerste afslaan vind om 11:00 plaas.

Registrasie kan vanaf 08:00 gedoen word.

Skakel Janette Birkenstock by 083 232 0363 vir meer besonderhede.