Vereeniging vier vanjaar sy 130ste bestaansjaar. Om dit te herdenk, kyk Vaalweekblad vanjaar terug na interessante gebeure wat hier afgespeel het, en kleurryke mense wat die stad se karakter help bou het. Oom Dirk Klynsmith was een van hulle….

MooiVaal Media se personeel het deur die jare talle interessante inwoners van Vereeniging ontmoet wanneer hulle Dinsdae hul week se Ster en Woensdae hul Vaalweekblad by ons Vereeniging-kantore kom haal het. Baie van hulle het mettertyd geliefde vriende geword.

Een van hulle was oom Dirk Klynsmith, wat al in sy tagtigs was toe Vaalweekblad se personeel hom jare gelede ontmoet het. Wat hom so interessant gemaak het, was dat hy verskeie inheemse tale vlot kon praat.

Onder die swartmense van Vereeniging het hy as Mokoena bekendgestaan en het tot groot vermaak van almal in ons koerantkantoor, ewe glad Zoeloe, Xhosa, Sotho, Tswana, SiSwati en SeNdebele met ons swart personeellede gepraat.

Hy kon natuurlik ook Afrikaans en Engels praat, hoewel hy ruiterlik erken het dat hy maar van altyd af sukkel om Engels behoorlik onder die knie te kry.

Hy het die inheemse tale as kind op ‘n plaas in die Reitz-omgewing leer praat en in 1970 na Vereeniging verhuis, waar hy destyds in Risiville gewoon het.

Deur die jare het ons ongelukkig kontak met hom verloor. Vaalweekblad het hom of sy familie nou weer op Facebook probeer opspoor en toe kontak gemaak met sy kleinseun, Eben Klynsmith, wat tans in Amerika is.

Die slegte nuus is dat oom Dirk in April 2020 aan hartversaking gesterf het. “Hy was regtig enig in sy soort,” sê Eben.

**********************************************************************************