MEYERTON – Lede van die MAC’S Vaalmotorfietsklub het op 31 Oktober gewys dat hul betrokkenheid by die gemeenskap verder strek as motorfietse en die pad toe hulle bakkievragte vol kos en noodsaaklike produkte aan behoeftige mense in die Vaaldriehoek geskenk het.

Klublid Thomas Pelser het die uitreik gereël en sowat 35 tot 40 lede het Saterdag gehelp.

Klublede het self bygedra en ook skenkings van buite die klub ingesamel.

Lynca Meats het vleis geskenk. Die lede het eers by Pelser se huis gebraai en daarna na die Lewenskruispaaie Sorgsentrum in Buyscelia vertrek.

Daar het hulle onder meer mieliemeel, rys, aartappels, eiers, groente, pasta en noedels afgelewer.

Christo Stander het die klub namens die sentrum bedank.

Volgens hom help die sentrum sedert 1981 mense in nood. Dit huisves tans sowat 75 mense en berei maandeliks meer as 6 000 etes voor.

“Die kos wat die MAC’S vanoggend hier aangebring het en die skenking – wow, dit is net fantasties,” het Stander gesê.

Hy het gesê die skenking sal die sentrum help om sy inwoners van etes te voorsien.

Tydens die besoek het hy ook in die sentrum se kerksaaltjie vir die klub en sy lede gebid.

Ná die besoek aan Lewenskruispaaie het die klub ook mense by ’n tweede plek in die Meyerton-omgewing gehelp.

Volgens Steven Moller (MAC’S president) het die klub tydens die uitreik ook klere, komberse en skoolbenodigdhede aan kinders geskenk.

Moller het gesê die klub reik gereeld uit na mense wat swaarkry, veral teen die einde van die jaar wanneer hulle kinders met skoolbenodigdhede kan help.