VANDERBIJLPARK. – Just Dance Studio bied op Vrydag, 9 Desember ‘n fondsinsamelingskonsert aan ten bate van Ons Gryse Jeug in Sasolburg en Chalkboard Champs sentrum vir kinders met spesiale behoeftes.

Die tema is Om die Wêreld en al die studio se dansers, asook die kinders van Chalk Board Champs gaan deelneem.

Toeskouers wat aan boord van die spesiale “vliegtuig” wil gaan moet om 18:00 by Laerskool Kollegepark wees.

Die vertoning beloof om ‘n draai in van die wêreld se mooiste lande te maak, alles op die maat van vrolike musiek uitgevoer deur belowende talent.

Leandi Goosen sê daar sal ook kort video’s van elke land gespeel word. Die kinders is reeds super opgewonde en hoop om voor ‘n vol saal op te tree.

Kaartjies beloop R100 per persoon. Daar sal ook ‘n donasiehouer wees vir ekstra donasies vir die twee instansies.

Vir navrae of besprekings, kontak Leandi Goosen by 0825556284.