(Vaalweekblad Redakteur: Elsje Vermeulen, wat toevallig daar was het die die hele gebeurtenis waargeneem en foto’s geneem).

Daar was skielik bloed in die water en toe maak die seekoeitjie sy veskyning. Te cute vir woorde!

‘Daar kon eers nie genoeg ge-oe en ge-aa word deur die besoekers nie, en toe volg daar skielik ‘n paar benoude oomblikke. Dit het voorgekom of die ma haar baba van die pa probeer weghou en toe almal weer sien is baba by pa, en pa maak sy bek oop oor baba se kop.

Op daardie stadium het ek en ‘n paar omstanders geskree en sommer ‘n ent weggehardloop. Gelukkig het die ma haar baba weer daar weggekry en die klein woelwater het veilig aan die ander kant van die dammetjie gaan swem.

Elana Smalberger (bestuurder van die Animal World Dieretuin) was kort daarna op die toneel en het dadelik beheer geneem. Die seekoeitjie moes vir sy eie veiligheid uit die kamp gehaal word.

Die ma en pa is met kos weggelok en toe dit veilig was, het Elana sommer klere, skoene en al in die dam gespring en die baba na die vlak kant geneem. Die nuweling is daarna veilig uit die water getel en na sy eie kamp geneem.

Eerste video: Benoude oomblikke na seekoeitjie se geboorte – geneem deur Brandon Mathews, ‘n leerder van HS Transvalia in Vanderbijlpark.

Tweede video: Seekoeitjie vir veiligheid van pa weggehou – geneem deur Elsje Vermeulen.