Siekte eis distriksdirekteur in die kantoor van die speaker van Sedibeng
Hy sal onthou word as ‘n aktiewe lid van die gemeenskap wat ’n bewyse bydrae tot die ontwikkeling van die Midvaal Plaaslike Munisipaliteit gemaak het.
MIDVAAL. – Die distriksdirekteur in die kantoor van die speaker van Sedibeng, mnr. James Dlangamandla, is onlangs oorlede weens siekte.
Die burgemeester van die Midvaal Plaaslike Munisipaliteit, rdh. Peter Teixeira, het in ’n verklaring sy innige meegevoel oor Dlangamandla se heengaan uitgespreek.
Dlangamandla is destyds as raadslid van die Midvaal Plaaslike Munisipaliteit verkies, is toe tot die burgemeesterskomitee van die Sedibeng Distriksmunisipaliteit verkies en het die laaste paar jaar gedien as die distriksdirekteur in die kantoor van die speaker van Sedibeng.
Volgens Teixeira het Dlangamandla ’n bewese bydrae tot die ontwikkeling van die Midvaal Plaaslike Munisipaliteit gemaak.
“Hy was altyd gretig om te help tydens sy ampstermyn as burgemeesterskomiteelid van Vervoer en infrastruktuur.
“Ons stuur ons innige simpatie en meegevoel aan sy familie, vriende en kollegas. Mag sy siel in vrede rus,” het Teixeira in ’n verklaring gesê.
