Midvaal-brandweer help uit toe Emfuleni se diesel glo op raak
Die Midvaal-brandweer se hulp is Dinsdagoggend (24 Januarie 2023) ingeroep om 'n brand by 'n huis in Gary Playerstraat in Unitaspark te blus toe die Emfuleni-brandweer blykbaar nie diesel gehad het om na die toneel uit te ry nie.
VEREENIGING. – Volgens omstanders het die brand in die omgewing an 08:00 ontstaan.
Die Emfuleni-brandweer is ontbied maar het glo nie diesel gehad om na die toneel uit te ry nie.
Klippies Kritzinger van die Goue Driehoek-sakekamer het in ‘n plasing op Facebook-gesê dat lede van die gemeenskap moes help om die brand onder beheer te bring.
Die Midvaal Brandweer het later van Meyerton af Vereeniging toe gery om die brand te blus.
“Emfuleni Plaaslike Munisipaliteit, julle is ‘n verleentheid! Nooddienste moet ‘n prioriteit wees, maar nie in Emfuleni…waar salarisse die prioriteit is nie,” het Kritzinger geskryf.
Vaalweekblad het navrae rondom die voorval aan die Emfuleni Plaaslike Munisipaliteit se woordvoerder, Chuchi Radebe, gerig.
Ons wag nog vir terugvoer maar sal die kommentaar plaas sodra ons dit ontvang.
