Ferreira en Kruger wen Midvaal Fast One-fietswedren
Franco Ferreira, 'n veteraan fietsryer van die Premier Logistics Solutions-fietsryspan, het Sondag (29 Januarie 2023) die Midvaal Fast One-fietswedren oor 103km gewen, nadat hy en twee ander ryers ongeveer 70km van die einde af van die groep weggebreek het.
MIDVAAL. – Franco, sy spanmaat, Drikus van der Walt, en Martin Pieterse van die Northcliff Cycles-fietsryspan het die peloton met sowat 70km oor agtergelaat en toe saam weggebly tot die einde toe.
Franco het die naelrit by die einde gewen, met Pieterse wat tevrede moes wees met ‘n tweede plek. Franco se spanmaat, Drikus, het in die derde plek geëindig.
Tanit Kruger was die eerste dame oor die eindstreep met Erica Potgieter in tweede plek en Mamello Letsi in die derde plek.
Duisende fietsryers het Sondag aan dié fietswedren, wat deur die Rotariërs van Riverside in samewerking met die Midvaal Plaaslike Munisipaliteit aangebied word ,deelgeneem.
Dit is die eerste keer in twee jaar wat die wedren plaasvind. (Dit is in 2021 en 2022 weens die Covid-panemie gekanselleer).
Weens uitdagings met die toestand van die paaie moes die roete van dié gewilde fietswedren effens gewysig word.
Die elite-, o.23,- o.16- en elite dames-wedrenne is gekanselleer weens finansiële uitdagings, wat die verteraan-ryers vanjaar in die kollig geplaas het.
