Senior burger (67) ontvoer, vermoor
Die polisie van Vereeniging sê die lyk van ’n 67-Jarige vrou van Vereeniging wat Donderdag vermis geraak het is Maandag (6 Februarie 2023) in ‘n swart vullissak naby McKay Estates en Redan gevind.
VEREENIGING. – Die 67-jarige Charlotte Chrisine Fenn is blykbaar op Donderdag (2 Februarie 2023) die laaste keer gesien toe sy haar huis om 15:00 verlaat het.
Sy het glo in die rigting van die R59 gery met haar wit Kia met registrasienommer DY 08 GY GP.
Volgens kapt. Funda, ‘n woordvoerder vir die polisie in Vereeniging, is sy later as vermis aangemeld toe sy nie teruggekeer het nie.
Volgens Funda het ‘n ‘n verbyganger Maandag ‘n swart sak naby McKay Estates en Redan gemerk en onraad vermoed.
Die polisie is na die toneel ontbied waar hulle Fenn se liggaam aangetref het. Sy is vermoedelik geskiet en het verskeie wonde aan haar kop gehad.
Volgens Funda ondersoek die polisie ’n saak van ontvoering en moord.
Mense met inligting word versoek om die polisie se CrimeStop nommer by 08600 10111 of die Vereeniging-polisiestasie by (016) 450 2262 te skakel.
