VEREENIGING. – Die brand het Sondagaand omstreeks 19:30 by die bekende kafee op die hoek van Voortrekkerstraat en Rhodeslaan ontstaan.

Die vloere van die kafee was Maandagoggend (13 Februarie 2023) tydens Vaalweekblad se besoek nog bedek in ‘n swart laag roet.

Volgens David Mammouchi, ‘n familielid van die eienaar, het die kombuis die meeste skade opgedoen.

Mammouchi sê hy het omstreeks 19:30 Sondagaand ‘n oproep ontvang waarin hy meegedeel is dat daar rook uit die gebou uit borrel.

Die Emfuleni-brandweer is ontbied, maar volgens Mammouchi het hulle langer as ‘n uur geneem om uit te kom.

Dit is welbekend dat die brandweerstasie tans onder uitdagings, insluitend ‘n gebrek aan diesel, gebuk gaan.

Die eienaar Aghiles Amenna, ‘n Algeriese sakeman, is van Frankryk af op pad Suid-Afrika toe.