Vaal Marathon ploeg terug in gemeenskap
Die Vaal Marathon vind jaarliks op die eerste week van Maart in Vereeniging plaas. Tydens vanjaar se marathon is daar weer duisende rande vir liefdadigheidsorganisasies in die Vaaldriehoek ingesamel.
VEREENIGING. – ‘n Bedrag van R10.00 is op vanjaar se inskrywings gehef om die geld in te samel.
Vanjaar kon die Vaal Marathon Reëlingskomitee altesaam R21 810 vir LifeLine Vaal insamel en R17 790 vir Trimed.
LifeLine Vaal is ‘n nie-winsgewende organisasie wat konfidensiële berading 24 per dag aan die gemeenskap van die Vaaldriehoek bied.
Trimed, is ‘n sub-akute verplegingsentrum in Drie Riviere.
Die Vaal Marathon Reëlingskomitee het ook R8 000 aan Sharp EMS, ‘n ambulans- en nooddiensverskaffer wat tydens die Vaal Marathon bystand gebied het, geskenk.
Altesaam R5 000 is ook aan Proudly Three Rivers, ‘n organisasie wat met behulp van befondsing van die publiek Drie Riviere in stand hou en slaggate regmaak, geskenk.
Charl Beukes, voorsitter van die Vaal Atletiekklub het tydens ‘n spesiale ete, wat op Woensdag (26 April 2023) by die Footprints-restaurant in Vereeniging gehou is, alle rospelers bedank wat gehelp het om die marathon weer ‘n sukses te maak.
‘n Trofee is tydens die geleentheid aan Carl Bechem Africa (Edms.) Bpk., ‘n maatskappy wat in smeermiddels vervaardig, oorhandig vir hul besonderse verversingspunt tydens vanjaar se Vaal Marathon.
