*Die storie het eerste in die gedrukte weergawe van Vaalweekblad (26 Mei – 1 Junie 2023) verskyn. Koop ons koerant op Vrydae vir al die jongste plaaslike nuus.

VEREENIGING. – ‘n Graad vier-leerder van Laerskool Vryheidsmonument ontvang tans mediese behandeling vir beserings wat hy opgedoen het nadat hy met die reling van die skool se trappe afgegly en tot onder geval het.

Die voorval het soos wat Vaalweekblad verstaan Dinsdag, 23 Mei tydens klaswisseling gebeur.

Dit het vroeër vandeesweek op sosiale media gegons oor die voorval en ‘n gerug is verspei dat die seun deur ‘n ander leerder van die trappe ‘afgestamp’ is.

Die skool het die gerug egter in ‘n verklaring ontken.

“Die leerder het tydens klaswisseling, met sy tas op sy rug, sonder enige inmenging van enige derde party, teen die trappe se reling afgegly en afgeval tot onder,” skryf mnr. Pieter de Bruyn, hoof van Laerskool Vryheidsmonument, in die verklaring wat aan die Gautengse onderwysdepartement, sowel as Vaalweekblad gestuur is.

Na wat verneem word, is die voorval op video vasgevang en die beeldmateriaal is in die skool se besit. Vaalweekblad het nie toegang tot dié beeldmateriaal gehad nie.

Vaalweekblad verstaan die leerder is per ambulans na die Vereeniging Kopanong Hospitaal geneem vir behandeling.

“Die leerder ontvang tans mediese behandeling vir die beserings (wat hy) opgedoen (het),” skryf mnr. De Bruyn in die verklaring.

Vaalweekblad verneem die seun se ouers was blykbaar baie ontsteld oor die voorval en het Woensdag, 24 Mei die skoolhoof ontmoet waartydens feite rondom die voorval deurgegee is.

“Die leerder se ouers en die Onderwysdepartement is in kennis gestel en alle protokol gevolg.

Personeel het reeds ‘n risiko assessering gedoen om soortgelyke voorvalle te probeer voorkom.

Die skool wens ons leerder en sy ouers alle sterkte toe met die herstelproses en bied, sonder benadeling van regte, ons samewerking waar moontlik,” skryf mnr. De Bruyn.