Daar gaan drie roetes met waterpunte wees waaraan deelgeneem kan word. Deelnemers kan kies of hulle die 2 km , 4 km of 8 km wil aandurf. Al drie die roetes se deelnemers spring om 08:00 by die kerkgebou weg.

So bring jou gesin en woef (aan ‘n leiband) en geniet die dag saam. Elke deelnemer sal ’n spesiale medalje by die eindpunt ontvang. Die medalje sal jou ook gratis toegang tot die saal gee waar veskeie aktiwiteite gaan plaasvind.

Na die ontvangs van medaljes sal deelnemers iets te ete en te drink kan koop. Lekker boereworsrolletjies, pannekoek, koffie, tee en koeldranke sal te koop wees.

Verlede jaar was daar meer as 200 medaljes los geloop. Inskrywingsfooi is R10 per kilometer en die winste is ten bate van 4 Ankers se basaarfonds. Om deel te neem kontak 083 5774932.

Vir die wat nie wil loop nie maar eeders speel, sal daar verskeie speletjies in die saal aangebied word. Daar sal ook ‘n springkasteel vir die kinders wees.

Nog ‘n hoogtepunt is die potjiekos-kompetisie. Die potte gaan prut vir groot pryse. Ingeskrewe potjiekospotte sal van vroeg-af reeds op die vure wees.

Alle meester potmakers word uitgenooi om ‘n potjie in te skryf. Kom maak ’n meester pot, dek ‘n tafel en trakteer jou gaste.

Indien jou potjie aangewys word as die wenner van een van die kategorieë, maak die beoordelaars die kampioen se beursie R1 000 ryker.

Daar is ook vele aansporings pryse wees. Inskrywings sluit 20 Augustus. Alle besonderhede en inskrywing reëls is by die kerkkantoor beskikbaar of e-pos vierankers@absamail.co.za. of skakel 016 976 7500

Spesiale afvalpotjie vir die fynproewers

Vooraf bestellings kan gemaak word vir die spesiale aanbod. Teen R50 per ete kan seker gemaak word dat so ’n ete op 2 September om 12 uur afgehaal of by die kerk geëet kan word.

Aansit-tafels sal beskikbaar wees. Andersoortige potjies sal ook te koop wees, maar die afvalpotjie-etes moet vooraf bestel word.
Kontak die kerkkantoor vir bestellings by 016 976 7500 of e-pos vierankers@absamail.co.za.