VEREENIGING. – Eurekaskool se jaarlikse ope skaakkampioenskappe het weer vir groot pret, konsentrasie en opwinding gesorg.

Meer as 300 skaak entoesiaste (van meesters tot by beginners) het Saterdag, 29 Julie saamgetrek om in verskeie kategorieë mee te ding.

Uiteindelik is die Internasionale Meester: Colomban Vitoux van Frankryk as kampioen gekroon, terwyl Dhiya Naidoo met die louere as die beste vroue kampioen vir die dag weggestap het.

Onder die spelers was daar 69 spesiale gaste. Die jong skaakspelers is almal leerlinge met spesiale behoeftes en hulle het die skaakdag baie geniet.

Naas al die opwinding rondom die skaaktafels, was daar ook ʼn vlooimark, eetgoed en ander speletjies.

Al die fondse wat op die dag ingesamel is gaan vir Eurekaskool vir leerders met erge fisiese en verstandelike gestremdhede.

Danie Koekemoer ʼn onderwyser en skaakafrigter by Eurekaskool het al die borge, gaste en spelers bedank wat van die dag so ʼn groot sukses gemaak het.