SASOLBURG. – Na ‘n week waar oor die 3 000 deelnemers hul talente op die verhoog by die Etienne Rousseau Teater ten toon gestel het, het die finale prysuitdeling van Talent Africa se nasionale kompetisie 8 Oktober plaasgevind.

Verskeie van die Vaaldriehoek se dans- en modelskole, asook individuele deelnemers het op die verhoog geskitter.

Xanthe le Roux van Vereeniging het aan haar 13de Talent Africa finaal deelgeneem in 13 items. In die ouderdomsgroep 18 – 24 het sy onder andere platinum verower vir Face of Talent Africa en fotogeniese gesigfoto.

In die drama afdeling het sy drie goue medaljes gekry, asook goud vir haar eisteddfod voorbereide lees en ‘n verdere sewe goue medaljes vir modelwerk.

Dan was Xanthe ook gekroon as die beste senior in dramategniek en was sy onder die top 10 senior akteurs. Die kersie op die koek was haar Senior Tripple Threat toekenning.

Nog ‘n Valie wat geskitter het, is Waldo Potgieter, (14) wat 13 medaljes (1 diamant, 6 platinum en 6 goud) ontvang het. Hy is ook gekroon as die junior National Face of Talent Africa.

Francois Jenkins (17) se musikale talente het hom ses goue medaljes besorg en hy het onder die top 10 vir instrumentaal en vokaal geëindig.

Dan het hy ook spesiale toekennings ontvang as mees belowendste in instrumentaal en as beste vermaaklikheidster vokaal.

Hoërskool Vaalpark se Chamei van Heerden het twee silwer en een goue medalje opgeraap vir haar solo, duet en groepoptredes. Sy het ook gekwalifiseer om internasionaal te gaan deelneem.

Leona’s Dance Studio in Sasolburg se dansers het hul goed van hul taak gekwyt in verskeie dansitems en is met twee brons, 32 silwer, 19 goud en een platinum medalje gekroon.

Almal het gekwalifiseer om deel te wees van die SA span om aan Stars of the Universers, Virtual deel te neem in Desember.

Terwyl Marli Beckmann, Milandri Fourie, Ireze Fourie, Sune du Rand, Chamei van Heerden, Caroli Lombard, Mardeli Kriel, Caro van Schalkwyk en Daniel Lombard gekwalifiseer het om deel te wees van die span wat aan die Mediterranean Legends International Art Festival in Spanje gaan deelneem in 2024.

Tussen die junior en senior prysuitdelings is daar ook ‘n Talent Africa gala-vertoning aangebied waarin verskeie Valies hul talente vertoon het.

Een van die items wat die meeste aandag getrek het was die The DanCeWorX Jive wat uit vrolike tapdansers van die DanCeWorX studio in Sasolburg bestaan het.