Kwaai bye hou ELM werkers uit hul werk
'n Byeboer se hulp is ontbied sodat daar weer water aan die kleinhoewes voorsien kon word.
Piet Smit, VF Plus-raadslid: Emfuleni-plaaslike munisipaliteit, het in ‘n mediaverklaring verduidelik dat kwaai bye die oorsaak was dat inwoners van die Roodia- en Stefanoparkhoewes etlike dae (langer) sonder water was.
Die VF Plus en munisipale werkers het verlede week vyf dae lank na die waterlekkasie gesoek wat die hoewes waterloos gelaat het.
Die waterlekkasie is agter ʼn grensmuur opgespoor, maar die groep munisipale werkers het geweier om die lekkasie te herstel weens ʼn byenes langs die grensmuur.
Die VF Plus moes inderhaas ʼn byeboer skakel om die koninginby te kom verwyder.
Die lekkasie kon gister herstel word nadat die bye ʼn ander heenkome gevind het.
Inwoners van die hoewes moes intussen water by watertrokke gaan haal wat op strategiese plekke geplaas is.
Verskeie inwoners het ook hul boorgate beskikbaar gestel aan ander inwoners.
