Nuwe atletiekseisoen – Parkies behaal groot sukses
LS Kollegepark se atlete het die nuwe seisoen op 'n goeie noot afgeskop.
VANDERBIJLPARK. – Laerskool Kollegepark het die atletiekseisoen op ‘n goeie voet begin. Die Super 12 se eerste atletiekbyeenkoms vir die nuwe seisoen het 21 Oktober in Pretoria plaasgevind.
Kollegepark is die enigste laerskool in die Vaaldriehoek wat deel is van die Super 12. Tydens die byeenkoms het vyf atlete goeie prestasies behaal.
Tinashe Sithole (dogters o.9) is as Junior Victrix Ludorum aangewys nadat sy eerste oor die wenstreep was in die 80 m en derde in die 60 m naellope.
Die De Clercq sussies, Emma en Miané het albei tweede plekke in onderskeidelik die 1 200 m vir dogters o.10 en dogters o.12 losgehardloop.
In die velditems het Joane Botha ‘n derde plek verower vir gewigstoot, dogters o.11 en Dario Saayman het derde plek behaal vir hoogspring, seuns o.12.
