Kuns uit die boonste rakke
Die Vaaldriehoek het vele talentvolle kunstenaars. Dit is weer bewys by die Vereeniging Kunsvereniging se jaarlikse kunsuitstalling.
VEREENIGING. – Die Vereeniging Kunsvereniging het hul jaarlikse uitstalling op 25 November aangebied. Die geleentheid het ook gedien as ‘n prysuitdeling, daar is ‘n veiling op van die kunswerke gehou en lekker saamgekuier met die kleurryke skilderye in die agtergrond.
Die kunsvereniging bestaan al meer as vyf dekades en elke jaar is daar groot opgewondenheid om die uitstalling die lig te laat sien.
Hierdie jaar het die voorsitter, Mattie Joubert, ook ‘n reeks miniatuur Monets ten toon gestel. Elkeen is kunstig geskilder om van Monet se grootste werke uit te beeld kompleet met ‘n agtergrondstorie by.
Van die beste skilderye uit die uitstalling sal vir die volgende ses maande die gange van die Midvaal Privaat Hospitaal versier.
Die skilderye wat by die hospitaal vertoon word, word elke ses maande vervang en kan gekoop word.
Die kunsvereniging skenk 10% van die opbrengste aan die hospitaal se liefdadigheidsprojekte.
Besoekers en lede van die kunsvereniging het die middag terdeë geniet. Die kunsvereniging het die hoop uitgespreek dat meer mense in die toekoms hierdie uitstallings sal bywoon.
“Hulle hoef nie die kunswerke te koop nie, maar ons wil kuns in die Vaaldriehoek lewendig hou, en dis altyd lekker as meer mense aan kwaliteit kunswerke blootgestel word,” het een van die vereniging se ouer lede, en self ‘n erkende skilder, Marlene Wattenbach gesê.
