Soos gepubliseer in Vaalweekblad se uitgawe van 8 Desember 2023

SASOLBURG. – ‘n Groot dag het Woensdag, 6 Desember, vir Michael Pretorius aangebreek toe hy sy eerste treë met sy kunsbeen kon gee.
Vir die Pretorius-gesin was dit ‘n hoogtepunt te midde van die afgelope ses maande se hartseer: Michael en sy ouer broer, Nicky, was op 28 Junie in ‘n motorongeluk langs die Ekopark betrokke. Nicky het ‘n dag na die ongeluk in die hospitaal beswyk en Michael se linkerbeen was so erg beseer dat dit later geamputeer moes word.
Verskeie insamelingsprojekte is die afgelope maande geloods om vir sy kunsbeen en verdere rehabilitasie te betaal, en Woensdag kon hy sy been vir die eerste keer aansit.

“Ons is oneindig dankbaar teenoor Simone van Prinsloo Orthopedics en almal wat gehelp het om dit moontlik te maak,” sê Michael se pa, mnr. Nicky Pretorius senior.
“Michael se gemoed en algemene fisiese toestand is so goed dat hy sommer dadelik sy permanente been kon kry. Almal was Woensdag baie beïndruk met hoe mooi hy van die begin af met die kunsbeen reggekom het. Hy gebruik nog krukke om hom met sy balans te help, maar hy behoort oor ‘n week of twee selfstandig te kan stap,” sê mnr. Pretorius.

Michael het slegs 45 kg geweeg toe hy uit die hospitaal ontslaan is, maar het in die afgelope weke reeds 20 kg opgetel. Hy word nog tuis met sy versorging bygestaan maar kan elke dag meer dinge vir homself doen. Hy kan selfs weer ‘n outomatiese kar bestuur.
“Ons almal se verlange na ‘klein’ Nicky is nog soos ‘n roller coaster-rit. Ons eerste Kersfees sonder hom lê nou voor. Dis baie emosioneel en hartseer vir ons. Ons beplan om Kersdag as familie saam te eet, blomme op my ma en Nicky se grafte te gaan plaas en Nicky se kruis by die plek van die ongeluk te gaan terugsit,” sê mnr. Pretorius.
Ondanks die hartseer kyk die gesin vorentoe, met die wete dat hul liefde vir ‘klein’ Nicky en sy nagedagtenis vir altyd lewend in hul harte sal bly.