Die SAPD was glo reeds vir ‘n wyle op die spoor van ‘n verdagte, mnr. Johan Moller, insake uitstaande lasbriewe en verskeie bedrogsake teen hom.

Na wat verneem word was hy woonagtig op ‘n kleinhoewe in die Barrage-gebied. Hy het egter verdwyn nadat dit aan die lig gekom het dat die SAPD op sy spoor was.

Hy het glo alles by sy woning op die kleinhoewe net so gelos en ‘n ander skuilplek gevind.

‘n Kamerastelsel wat deur privaat maatskappye gebruik word, het egter Vrydag, 12 Januarie sy voertuig op die R42 bespeur en die polisie in kennis gestel.

Lede van die SAPD se K9 (honde eenheide) het hulp verleen om die verdagte omstreeks 14:50 vas te trek op die R42 naby die Potchefstroom afrit (R553).

Moller was glo op sy foon besig toe hy afgetrek is.

Hy was volgens inligting wat ontvang is rustig en het hom nie verset nie. Hy is deur die polisielede gearresteer en geboei.

Hy het egter kort daarna met geweld losgeruk en doelbewus voor die wiele van ‘n aankomende swaarvoertuig ingespring. Die voorval is op videokamera vasgevang.

Hy is op die toneel dood verklaar.