VAALPARK. – Hanro, beter bekend as Vinkie Read, het 17 Januarie as graad 1-leerling na sy klas by Vaalpark Primêr gestap.

Soos duisende ander graad eentjies, effens onseker oor wat wag, maar tog opgewonde. Dat hy dit kon doen is net genade, harde werk en deursettingsvermoë.

Vinkie was maar vyf jaar oud toe hy en sy gesin in April 2022 in ‘n motorongeluk was.

Van almal in die gesin het hy die ergste seergekry en is met onder meer breinbeserings in die traumaeenheid in Alberton opgeneem.

Almal het gebid en laer getrek rondom die Reads. Die spesialiste het saamgespan. Vinkie is onder sedasie gehou en stadig maar seker het daar verbetering ingetree.

Hy het een en almal verras en is 1 Julie 2022 ontslaan. Arbeids- en fisioterapie het volstoom voortgegaan en teen Januarie 2023 kon hy hy weer touspring en fiets ry.

Verlede jaar was hy in graad R en hierdie jaar durf hy die groot skool aan met sy kenmerkende glimlag en rustige geaardheid.