VANDERBIJLPARK. – Die wanfunksionerende verkeersligte by die besige kruising tussen Rossini- en Frikkie Meyer-boulevard is verlede week uiteindelik herstel nadat dit weke lank frustrasies vir motoriste veroorsaak het.
Verskeie lesers het die afgelope weke gerapporteer dat al die rooi ligte aan albei kante van die kruising werk, maar wanneer een van die kante na groen moes oorslaan, was die groen ligte skielik dood. Motoriste vir wie die lig groen moes word, het dan gesit en wag daarvoor, onseker oor wie wanneer moes ry. Dit het veral soggens en smiddae gedurende spitstye tot verkeersopeenhopings gelei.

‘n Video waarin die Vanderbijlparkse sakeman, mnr. Fanie de Jongh, motoriste oor die gevaar by dié kruising waarsku, het op 17 Januarie binne enkele ure ‘n reikwydte van meer as 10 000 op Vaalweekblad se Facebook-groep bereik. De Jongh het genoem dat die wanfunksionele ligte reeds weke terug gerapporteer is, maar dat niks nog gedoen is om dit reg te stel nie. Hy was bekommerd dat iemand eers gaan sterf voordat die betrokke owerheid dit regmaak.

Verskeie Vaalweekbladlesers het gereageer en ook kommer oor die situasie uitgespreek. “Ons moet nou weer elke dag daardie pad skool toe ry en is bang vir ‘n ongeluk daar,” het Anoezka Aucamp laat weet. Wilma van Druten het dit beaam en gesê die verkeer by die kruising is soggens ‘n nagmerrie wanneer sy haar kinders skool toe neem. Esna Kruger het ook die hoop uitgespreek dat die verkeersligte gou herstel sal word nadat sy, haar man en kinders van onderskeidelik 6 en 1 jaar oud, byna in ‘n ongeluk daar betrokke was.
Nog lesers, soos Paula Ernst, het voorgestel dat alle verkeersligte aan albei kante liewer heeltemal afgeskakel moet word indien dit nie herstel kan word nie, sodat motoriste die kruising eerder as ‘n vierrigting-stop sal beskou.

Die probleem is egter nou iets van die verlede. Enkele dae na mnr. De Jongh se videowaarskuwing is die ligte herstel en alles werk nou weer soos dit moet. Die herstelwerk is verwelkom deur talle lesers wat dié roete gereeld moet ry. Daar is egter steeds kommer oor verskeie ander verkeerskruisings in Vanderbijlpark en Vereeniging waar soortgelyke probleme met wanfunksionerende ligte ondervind word. Motoriste word aangeraai om alle verkeerskruisings waaksaam en baie oplettend te nader.