MIDVAAL. – “Verskoon my. Ek is vol sweet, maar die sweet wat op my voorkop sit is nie myne nie – dit is die sweet van al die mense wat ek vanmiddag verbygevat het.”

Só het Ryan Gibbons, Suid-Afrika se nuwe tydtoetskampioen, Vrydagmiddag skertsend gesê nadat hy die elite afdeling van die nasionale tydtoetskampioenskappe vir mans oorwegend gewen het.

Gibbons, wat deesdae vir die Lidl-Trek-fietsryspan ry en in Girona in Spanje gebasseer is, en Hayley Preen, een van Suid-Afrika se voorste vroue fietsryers, is Vrydagmiddag by Café du Cirque in Daleside as die wenners van die elite individuele tydtoetskampioenskappe vir mans en vroue gekroon.

Alan Hatherley en Brandon Downes moes tevrede wees met onderskeidelik die tweede en derde plek in die tydtoetskampioenskap vir mans.

Lucy Young (tweede) en S’annara Grové (derde) was die naaswenners in die vroueafdeling.

Die padwedrenne vind môre plaas en die padwedrenne vir die elite mans en vroue Sondag.