Chuck Kaaswors deel drukkies uit
VANDERBIJLPARK. - Chuck Kaaswors, die Vaal se eie Tik Tok-koning, het onlangs by die Pioneer Huis gaan inloer. Behalwe dat hy die inwoners se dag opgekikker het, het hy hulle ook met lekker sop en baie drukkies bederf.
“Ons het dit so waardeer. Die meeste van die inwoners het nie eers TIK TOK nie, maar hulle almal ken vir Chuck en kon nie genoeg foto’s saam met hom neem nie.
“Julle sal nie glo hoeveel bejaardes het na sy kuier kantoor toe gekom sodat TIK TOK op hul fone afgelaai word nie,” vertel me. Sonja van Rhyn (Pioneer Huis-administrasie).
Chuck werk nou voltyds vir mnr. Fanie de Jongh en spandeer meeste van sy tyd om liefdadigheidswerk te doen.
Dit is duidelik dat almal Chuck en Fanie se besoek sommer baie waardeer het.
“Ons kan nie wag vir jou volgende kuier nie,” het inwoners op Pioneer Huis se Facebookblad gesê.
En gelukkig het hulle toe nie lank gewag nie, want verlede Donderdag was Chuck terug om vir hulle te sing. Plaaslike sangeres Lizz het die keer saam met hom vir die vermaak gesorg.
Mooi so Chuck, jou glimlag kweek meer glimlagte.
