VAALDAM. – Die Fishing 4 Pets dag wat deur die Get Up and Go Omgee Vriendegroep gereël is, het 10 Februarie by Die Damwalle langs die Vaaldam plaasgevind.

Na die vorige nag se reën, was die opkoms nie so groot as wat verwag is nie. Daar het darem oor die R1 000 in die donasiekissie vir die Dierebeskermingsvereniging beland en daar is honde- en katkos ingesamel.

Die weer het mooi saamgespeel en die tipiese Vaaldamwind het eers na 14:00 begin waai.

Deur die loop van die oggend is daar vrolike musiek, van visvangliedjies tot by Country gespeel, terwyl plaaslike kunstenaar, Andries de Beer ook sy sangtalent ten toon gestel het.

Die visse het nie heeltemal saamgespeel nie. Die ou grotes was seker weg vir die naweek, maar die kleiner karps het gereeld hul verskyning gemaak.

Daar is ywerig foto’s geneem as ‘n vis gevang is, voordat dit weer vrygelaat is. Die enigste een wat ongelukkig was met die vrylatings was Silwer die Worshond.

Hy en sy pekinese boetie Baily het saam met hul mens-ouers René de Bruin en Johan du Plessis kom visvang. Baily het rustig onder die gazebo gelê, maar Silwer het opgewonde getrippel as ‘n vis ingekatrol is.

Wanneer die vis dan weer vrygelaat is, het hy elke keer tevergeefs in die vlakwater gesoek waar hy laas die vis gesien het.

Een van die dag se organiseerders en self ‘n bedrewe hengelaar, Johan van der Merwe het Stefan van Niekerk (14) se dag gemaak deur hom te help om sy eerste vis te vang.

Stefan het sy dobbertjie met ‘n valkoog dopgehou en die opgewondenheid was groot toe hy die vis uittrek. Johan het hom verseker dat dit hengeltradisie is om jou eerste vis te soen, wat die jongman dan ook plegtig gedoen het alvorens hy die vis weer laat swem het.