SASOLBURG. – Bikerklubs is volop in die Vaaldriehoek, maar dan kry jy die Old School Bikers Social Riding Club. ‘n Amptelike klub met reëls en regulasies is hul nie, wel ‘n groep pensioenarisse wat gereeld saam die pad vat.

“Ons moet die tyd omkry. Dis vervelig op pensioen,” spot Rassie Erasmus. Almal in die groep is ou vriende en ry al jare saam. Meestal Woensdae.

Wie ook al beskikbaar is val om 09:00 in en dan kies hul koers in ‘n rigting. Party dae Parys, ander dae so ver as Potchefstroom of rigting Vaaldam.

Daar was die keer toe hul Petrus Steyn toe is en die wind so gewaai het. “Ons het almal daardie dag natgereën,” onthou Johan Grobler.

Alles is nie net altyd vir hul eie plesier nie. Die manne het ook ‘n groot hart vir die gemeenskap en gaan uit hul pad om te help waar hul kan.

Daar was die keer wat hul geld ingesamel het om ‘n spesifieke saal vir ‘n blinde meisie te koop wat perdesport gedoen het.

Verlede jaar was hul betrokke by ‘n MS-lyer, Rinette Broers se begrafnis in Sasolburg. Dan is daar die groot Blanket Drive wat hul elke wiinter aanpak met die hulp van onder andere die Centurions MC Vaal klub.

By die geleentheid samel hul kos, klere, komberse en selfs skryfbehoeftes in om deur die VF+ onder behoeftiges versprei te word. Die Blanket Drive vind gewoonlik in Junie by Sharky Town plaas.

Individue wat komberse en dies meer wil skenk, kan vir Rassie by 082 458 3785 kontak. Nog ’n hoogtepunt op hul jaarkalender is die jaarlikse Toy Run.

Die meeste van die manne is weermagveterane en hul probeer sover moontlik ook daar betrokke raak en help.

Vir hulle gaan dit oor die weeklikse uitkom, die kuier saam met ou vriende, die lekker eet en as hulle boonop ander ook kan help, is dit vir die pensioenaris-bikers die kersie op die koek.