VANDERBIJLPARK. – Die Golden Triangle of Commerce (GTCoC) se grootskaalse wêreldrekordfees is om die draai.

Saterdag, 16 Maart gaan dinge gebeur by die Emerald Resort & Casino. Hekke open om 10:00 en kaartjies is teen R195 per persoon aanlyn te koop by https://tickets.tixsa.co.za/event/rockingthe-vaal.

Jou toegangskaartjie gee jou 50% afslag vir die dag by die Aquadome en by Animal World, asook ‘n Diamond Drop kaartjie, ‘n potjiekos-bunny-chow vir aandete en toegang na die dag en aand se musiekproduksies.

Groot name in die Afrikaanse musiekbedryf het saamgespan om ‘n spesiale produksie op die verhoog te bring. Elke kunstenaar gaan nie sommer maar net ‘n paar liedjies sing nie.

Hierdie is ‘n hele topgehalte produksie spesiaal vir Rocking the Vaal geskryf. Eenmalig met Tarryn Lamb, Ruhan du Toit, Refentse, Jo Black, Riaan Benadé en Samantha Leonard.

Bekende radio-omroeper en sanger, Martin Bester gaan ook deur die loop van die dag optree. Daar gaan stalletjies te kies en te keur wees met allerlei lekkernye te koop.

Dan is daar natuurlik die vier wêreldrekords wat aangedurf gaan word. Die serp van 35 000 km, die 1 000 brode wat gebreek gaan word, die 1 000 snye wat gesmeer gaan word en die groot, groot, groot pot waaruit 10 000 mense lekker kos gaan kry.

Alles vir liefdadigheid. Kom deel in die pret. Dit beloof om ‘n eenmaal in ‘n leeftyd skouspel te wees.

Jaco Verwey, voorsitter van die GTCoC het gesê toegangskaartjies is die hele dag geldig.

So jy kan ‘n draai kom maak, huis toe gaan of na jou kinders se sport gaan kyk en weer later terugkom. Hou net jou kaartjie byderhand.