VANDERBIJLPARK. – Saterdag, 16 Maart maak die hekke oop vir die grootste skouspel wat die Vaaldriehoek nog gesien het.

By die Emerald Resort & Casino is daar die hele week al ‘n groot bedrywigheid op die agterste veld aan die gang. Daar is Maandag al aan die verhoog begin werk en teen Dinsdagaand het die manne al verby dakhoogte op die stellasie rondgeklouter.

Woensdag is die massiewe pot van 4 m hoog en 2.5 m in deursnee op die agterkant van ‘n groot trok ingebring, waarna dit stadig met ‘n hyskraan laat sak is.

In die GTCoC se kantore word daar nog van vroeg tot moeg gewerskaf aan die 35 000 serpe en teen Donderdagoggend was die serp al ‘n blou tapyt op die grond.

Almal werk teen tyd, want alles moet gereed wees wanneer die hekke oopmaak.

Kaartjies is steeds aanlyn beskikbaar teen R195 per persoon.

Bring jou eie stoel of kombers om op te sit. Onthou jy kan in en uitgaan soos jy wil deur die dag, solank jy net jou kaartjie toon.