#1Nation5000Units ‘n groot sukses
Van die Rotariërs tot by die Voortrekkers was Saterdag deel van die nasionale bloedskenkprojek.
VANDERBIJLPARK. – Die Suid-Afrikaanse Nasionale Bloeddiens (SANBD) het Saterdag, 13 April hul doelwit van 5 000 eenhede bloed op een dag oortref en meer as 5 600 eenhede ingesamel.
In die Vaaldriehoek het inwoners ook gehoor gegee aan die oproep om bloed te skenk en die Vereenigingtak het by die 240 eenhede ingewin.
By die bloedskenkstasie in die Vaal Mall was daar van vroeg af ‘n gewoel. Teen 12:00 is daar reeds meer as 30 eenhede geskenk.
Die stasie is naas die SANBD-span ook beman deur die Rotariër Klub van Vanderbijlpark.
Die Rotariërs het nie net gehelp om mense te kry om bloed te skenk nie, die span het self ook geskenk.
Die Orion Voortrekkers het ook hul deel gedoen en was vroeg-vroeg al daar. Die offisiere en van die ouer Voortrekkers het geskenk, terwyl die jongspan die nodige morele ondersteuning gebied het.
Elizabeth Seko van die SANBD Vereeningtak het gesê hul volgende groot projek vind plaas by Sasolburg Boulevard op 27 April.
Kom ondersteun hulle asseblief en red ‘n lewe. Vir meer inligting oor hoe en waar om bloed te skenk, besoek gerus www.sanbs. org.za.
