VAALPARK. – Dit was ‘n soet lekkerte op ‘n Vrydagmiddag vir die kleuters by Lumiére Primêre skool.

Die skool se pom-poms, in pienk getooi, het die jongelinge vermaak. Na die vrolike danspassies was die kleingoed gereed vir die middag se groot aksie.

Elkeen het ‘n Lumie voorskoot aangetrek en die kans gehad om soetkoekies met prentjies in te kleur.

Almal het ‘n kwassie, bakkie water en ‘n piepklein palet met eetbare verf ontvang.

Party het met groot konsentrasie weggeval en hul prentjies mooi ingekleur en ander het so vinnig moontlik kleur op die koekie gekry vir die belangrikste aksie van die dag, om die koekie te eet.

Met ma’s en pa’s wat byderhand was om raad te gee en so hier en daar trane af te droog, het almal die middag geniet.