Elke gimnas word deel van die familie
Die Fouries het 'n passie vir gimnastiek in al sy vorme en geniet dit om 'n liefde vir die sport ook by jongelinge te kweek.
VANDERBIJLPARK. – In die Fouriehuishouding word daar gimnastiek gepraat, geleef en gedroom. Letterlik.
Nie snaaks vir Ronel of Berné om laatnag koffiesessies te hê omdat een nie kon slaap oor ‘n gimnas se program nie.
Die twee is mede-eienaars van Emfuleni Gymnastics, terwyl hul seun, Coach Bonsai ‘n tak in Vereeniging oopgemaak het.
Die Fouries het die klub begin 2020 oorgekoop, alhoewel Ronel al sedert 2016 by die klub uitgehelp het.
Die pandemie het kort daarna toegeslaan en dit het dissipline en deursettingsvermoë gevat om die skip bo die water te hou.
Al hul harde werk het vrugte afgewerp en vandag is daar by die 300 jong gimnaste wat aan die klub behoort.
“Ons is bevoorreg dat ons kinders ook gimnastiekafrigters is en ons 100% ondersteun,” vertel Ronel trots.
Vir hulle is elke jong gimnas soos hul eie en elkeen word onthou. Berné vertel van Justin Brown.
As jong seun het Justin gesukkel om sy rekstok roetine onder die knie te kry. Hy was nie ‘n gebore gimnas nie, maar hy het aanhou oefen.
Uiteindelik het hy wel sy hele roetine by ‘n kompetisie voltooi waarvoor hy ‘n 7.6 punt gekry het.
Ander sou dalk in die punt vasgekyk het, maar Berné het die jong seun beloon met die Beste Rekstok in die klub trofee.
Hulle raak opgewonde saam met elke jongeling wat ‘n eerste vooroorrol regkry en voormalige gimnaste kom kuier steeds.
“Ons leef ons droom,” som Ronel dit op. “By die werk en by die huis,” voeg Berné by.
Die gesin woon op ‘n kleinhoewe en geniet die rustigheid terwyl hul werk aan hul gimnaste se volgende roetine, tuimel of sprong.
Vir meer inligting oor die voordele van gimnastiek vir kinders en klub inligting, besoek www.emfulenigymnastics.co.za.
