HENLEY ON KLIP – Allaurah Taylor en Hercules is onafskeibaar en kampioene in eie reg. Die duo het die naweek by die Friesian Winter Festival met die hoogste punte in albei hul dresseer klasse as wenners uit die stryd getree.
Allaurah (13) is versot op perde en ry al vandat sy twee jaar oud is. Sy het eers aan perdespring deelgeneem, maar het verlede jaar begin met dresseer (dressage) waar perd en ruiter saam ontwikkel om ‘n reeks van al hoe moeiliker bewegings onder die knie te kry.
Sy is tans ‘n graad sewe leerder aan die Leeuwenhof Akademie waar sy op die leerlingraad dien, deel is van die revue en aan alles van hokkie tot by netbal, atletiek en 5 trompoppies deelneem.
“By die skool hou ek die meeste van hokkie, maar perdry bly my gunsteling,” vertel sy. Volgende jaar gaan sy haar hoërskool loopbaan by die Leeuwenhof Akademie voortsit.
Sy het klaar besluit wat sy na skool wil doen. “Ek gaan ‘n resiesperdafrigter word, net soos my tannie”.
Die naweek neem sy aan nog ‘n perdekompetisie deel alvorens sy saam met die res van Leeuwenhof Akademie se graad 7’s op ‘n toer na die Wes-Kaap vertrek.
