VANDERBIJLPARK– Biokinetikus Michael Redelinghuys het in 2019 besluit om ‘n sub-akute sorgeenheid oop te maak. Dit was nadat sy swaer, Wimpie Joubert met ‘n gewas op die brein in ‘n fasiliteit in Aucklandpark beland het.

“Dit was so moeilik vir ons as familie in die Vaaldriehoek om by hom uit te kom. Dis ver en om in die aande te ry is gevaarlik,” onthou Michael.

Hy het toe al geweet dat om ‘n droom te verwesenlik nie maklik is nie. Tog was Michael nie heeltemal die opdraande stryd van meer as vier jaar te wagte om uiteindelik ‘n goedgekeurde, gelisensieerde fasiliteit te kon oopmaak nie.

Dit het deursettingsvermoë, onderhandelingsvernuf, geduld en geloof geverg. Op 26 Julie het sy ma, Edith Redelinghuys, die rooi lint geknip.

Sub-Acute 360 is gereed om hul eerste pasiënte in te neem. By die openingsgeleentheid het Michael se familie, vennote, vriende en gebedsondersteuners met dankbare harte vergader.

Dit was ‘n emosionele aand en menige het ‘n traan of twee afgevee toe daar uiteindelik in die netjiese fasiliteit ingestap kon word.

In die voorportaal is plaatjies met die name en gesegdes van mense wat saam aan die droom gebou het, maar wie oorlede is voordat dit ‘n werklikheid kon word.

Op die bord pryk onder andere sy pa, Tony Redelinghuys, sy skoonma Mickey Joubert, sy swaer Wimpie Joubert en die Vaal se geliefde swemafrigter, Benny Janssen se name.

Vir meer inligting en kontakbesonderhede volg gerus die fasiliteit se Facebookblad,