Musiek. Vir elkeen toor dit ander beelde en klanke op. Elkeen het sy voor en afkeure. Gerda Bruinette het by Noordskool in Sasolburg se juniors gaan hoor waarna hulle graag luister.

Logan Rautenbach

Ek luister Banani. (Dis ‘n Geel Lego Piesang op YouTube). Ek like elke liewe liedjie. Veral Bernice West se Lyfie. Ek kan die danspassies doen, maar nie reg nie.

Taylen Kriel

Afrikaanse musiek. Lyfie en Benoni (Lianie May) is my gunstelinge. Ek hou nie van Engelse musiek nie. Ek hou baie van sing en dans.

Anika Wassenaar

Ek luister wat my ma vir ons aansit. Haar gunsteling liedjie is Roar (Katy Perry). Daar is ‘n ander seun se liedjie in Afrikaans wat sy baie luister waarvan ek nie hou nie.

Zehan Wessels

Thunder (Thunderstruck van AC/DC) is my gunsteling. Ek maak my eie liedjies op in Engels en Afrikaans en ek speel tromme en tennis en krieket. Daar is nou te veel liedjies in my kop om vir jou een te sing.

Jaylyn Kennon

Jo Black, Eloff, Brendon Peyper, Taylor Swift. Ek het Jo Black se show gesien by die kerk. Hy’s my gunsteling. Ek hou nie van “ek ken ‘n liedjie wat almal irriteer nie.”

Liam Verster

Musiek is boring. Ek luister net Marsmello se liedjies. Eintlik speel ek net video games. Ek is ‘n gamer en ek het baie games.