Hin hin hin: Aksie by Ultimate Outlaws
VEREENIGING - Roos jou doring! Slegs 'n week nadat hy die Vaal se naam gestand gedoen het in die Kaap, het Jacques Roos vir pure plesier in die Sprints gesorg toe hy by Ultimate Outlaws wéér die wenvlag gevat het.
Die voorlaaste byeenkoms van die jaar is op 2 November by Ultimate Outlaws gehou.
Daar was lekker opwinding in al die klasse, maar toe die Sprint-motors hul verskeining op die baan maak het die adrenalien in toeskouers se are begin borrel.
Die Vaal spog met ‘n paar helde in dié klas wat natuurlik Jacques Roos, Andries Marx en Izak Spies insluit (elk met hul getroue aanhangers).
Marx het die eerste uitdun gewen, maar daarna het Roos oortuigend die tweede uitdun gewen en so ook die finaal om as die wenner van die aand gekroon te word.
Marx het die algehele tweede plek ingeneem en Spies die derde plek.
“Dit was lekker om in die Kaap te gaan jaag. Ek het nog nooit voorheen daar deelgeneem nie,” het Roos aan Vaalweekblad vertel.
Die byeenkoms in die Kaap was by Cape Helldrivers gehou. In die eerste uitdun het Roos in die laaste posisie (12e plek) weggespring, om derde te eindig.
In die tweede uitdun het hy in die tweede plek weggespring en eerste geëindig, en so ook in die finaal om as die algehele wenner gekroon te word.
Die Sprint-jaers sal op 7 Desember tydens die laaste byeenkoms van die jaar by Ultimate Outlaws, teen twee Amerikaanse jaers te staan kom.
Petrolkoppe word aangeraai om nie op dié aksie uit te mis nie. Daar word vuurwerke verwag, letterlik en figuurlik.
Uitslae van Saterdag se byeenkoms is:
Junior Develoment
1. Willliam Budler, 2. Matthys van der Merwe en 3. Ruaan Erwee.
StockRods
1. Waldi Henning, 2. Morné Thomas en 3. JJ van Niekerk
1660cc
1. Alexander Thesner, 2. Jonathan Thomas en 3. Hansie Havenga
2L Hotrods
1. Waldi Henning, 2. Chris Benecke en 3. Riaan van Dyk
Hotrods
1. André Johnson, 2. Amos Cockeran jr. en 3. Frankie Paiva
