VANDERBIJLPARK – Die naweek se hittegolf kon nie die Ratels en Vanderbijlpark Krieket Klub se eerstespan se entoesiasme demp nie.

Die twee spanne het mekaar Saterdagmiddag in ‘n Sedibeng Eerste Liga wedstryd aangedurf.

Met 20 boulbeurte tot elke span se beskikking het die spelers behoorlik uitgehaal en die rooi bal kort-kort grens toe gedryf.

Soms selfs in die bosse in en dan moes die veldwerkers eers op ‘n soektog gaan. Die Ratels het eerste gekolf en 161/4 aangeteken.

Hul beurt is geanker deur ‘n goeie vennootskap tussen WL Fourie (50* van slegs 52 balle) en Nathan Bezuidenhout (21* van 16 balle).

Vanderbijlpark se HJ Warrington het hulle laat les opsê en vyf paaltjies vir slegs 35 lopies ingeoes.

Net voordat Vanderbijlpark se kolfbeurt aangebreek het, het ‘n los bui reën almal onder die dak laat inskarrel.

Dit was egter gou verby en die spel kon voortgaan. Alhoewel Vanderbijlpark hul bes gedoen het, kon hulle nie die verlangde telling in die 20 boulbeurte kry nie en moes met 139/6 tevrede wees.

André Olivier (60 van 48 balle) en Gerhard Smit (51 van 47 balle) het vir Vanderbijlpark met die kolf geskitter.