Toy Run 29 – dit was net wow!
Die motorfietse, die mense, die hope speelgoed... alles vir 'n goeie doel.
VANDERBIJLPARK – Dit het vroeg Sondagoggend al by die Dros se parkeerarea begin woel.
Honderde motorfietsryers het van oral gekom vir die 29ste Vaal Toy Run van die Centurions Vaal Motorfietsklub.
Die motorfietse het geblink in die oggendson en elkeen het ‘n spesiale vrag gedra… teddiebere en ander sagte speelgoed.
Langs die pad het inwoners gereed gestaan om die brullende skouspel te aanskou.
Die kleurvolle stoet met Kersvader heel voor het hul weg na die Centurions Klubgronde in Shakespearstraat gebaan.
Met aankoms is die bere, pakkies en ander speelgoed op die verhoog in die saal gepak. Die was binne ‘n halfuur oorlopens toe vol. Daar was sagte speelgoed van elke grootte en kleur.
Buite het DJ Ben die musiek verskaf en die mense het oral onder gazebos gekuier. Die neerdrukkende hitte kon nie hul entoesiasme demp nie.
Van die bikers het eers hul bere nog rondgedra voordat hule ‘n ereplek op die verhoog gekry het. Rian Beeslaar van die Centurions MCC sê hulle was tevrede met die opkoms en die hoeveelheid speelgoed wat gekry is.
“Ons leer elke jaar en volgende jaar gaan dit nog beter wees,” het hy belowe.
Carol Blake-Zwarts het dit die beste op Centurions Vaal se Facebookblad vasgevang: “Dit was groot. Dit was mooi. Dit was suksesvol. Trots op julle bydrae tot ons minderbevoorregte gemeenskap.”
