Kleureprag langs (en op) die Vaalrivier
Kyk uit vir Kersliggies aan beide kante van die Vaalrivier hierdie Desember, en soms selfs 'n kleurvol verligte boot of twee
VANDERBIJLPARK – Die kinders het nuuskierig nader gestaan. Die Grinch het ook kom oë wys.
Die mense op die walle van die Vaalrivier by Stonehaven on Vaal se aandag was verdeeld tussen dit wat agter hulle gebeur en dit wat dalk aan die Vrystaatkant mag plaasvind.
Om 19:00 is die laaste sekondes afgetel en skielik was daar lig. Aan die anderkant van die rivier is huise en bome verlig met kleurvolle Kersliggies en aan die Gautengkant was Stonehaven skielik in wit feetjieliggies getooi.
Kort voor lank het daar ook ‘n boot of drie verby gevaar in kleurliggieprag. Intussen het die mense op die walle van die rivier die windstil aand geniet, terwyl kinders lustig op die gras baljaar het.
Dit was soos ‘n woordlose aankondiging. Die jaar is verby, die vakansie en die Kersseisoen is nou amptelik hier.
